„Færni mín“ er sá hluti Europass sem veitir þér yfirsýn yfir færni þína á grundvelli upplýsinganna sem þú færir inn í prófílinn. Upplýsingarnar í „Færni mín“ eru notaðar til að gera þér sérsniðnar tillögur um störf og námskeið.

Europass-prófíllinn er persónulegur prófíll. Farðu á heimasíðuna og smelltu á hnappinn „Búa til Europass“. Þér verður leiðbeint skref fyrir skref við að búa til þinn eigin Europass-prófíl. Þegar þú ert búin(n) að gera grunnprófíl (menntun og þjálfun, starfsreynsla, tungumálafærni, stafræn færni) geturðu síðan uppfært hann og slegið inn aðrar upplýsingar sem þú vilt skrá, s.s. verkefni, árangur og aðra færni.

Ef þú skráir þig á Europass geturðu bætt inn fleiri hlutum og búið til ítarlegri prófíl þar sem færni þín, menntun og hæfi og reynsla eru skráð öll á einum stað.

Ef þú skráir þig ekki geturðu ekki geymt prófíl án tímatakmarkana eða fengið aðgang að verkfærum á borð við Skjalasafnið mitt eða Færni mín.

Europass-prófíllinn er persónulegt, netrými þar sem þú færir inn alla færni sem þú hefur aflað þér, nám, starfsreynslu, og annan árangur og upplýsingar. Hann er svæði þar sem þú hefur tiltækar og getur skipulagt allar upplýsingar þínar. Prófíllinn gerir þér kleift að skrá alla færni þína og reynslu og hafa samantekna á einum stað. Þú getur notað upplýsingarnar í Europass-prófílnum til að búa til ferilskrár fyrir tiltekin störf eða námskeið sem þú sækir um.

Europass er ókeypis safn netlægra verkfæra og upplýsinga í boði framkvæmdastjórnar Evrópusambandsins. Því fylgir enginn dulinn kostnaður eða aukagjöld. Vinsamlega athugaðu að þú getur ekki keypt ferilskrá eða þjónustu hjá Europass. Öll þjónusta sem býðst á Europass er gjaldfrjáls og þú verður aldrei beðin(n) um að gefa upp bankaupplýsingar eða inna af hendi greiðslur. Ef þú hefur fengið slíkar beiðnir ertu vinsamlega beðin(n) um að hafa samband við viðkomandi innlend yfirvöld.

Ef þú skráir þig á Europass hefurðu aðgang að öllum eftirtöldum verkfærum:

• Europass-prófíll – ókeypis og persónulegt netrými til að skrá færni þína, menntun og hæfi og reynslu.
• Europass-skjalasafn – þú getur geymt, deilt og komið skipulagi á skjölin þín;
• Áhugamál mín – þú getur ígrundað og skilgreint það sem þú hefur áhuga á að læra eða starfa við;
• Færni mín – skoðað yfirlit yfir færni þína í prófílnum þínum;
• Netritill – þú getur búið til mismunandi ferilskrár og fylgibréf með ólíkum umsóknum;
• Leit að störfum og námskeiðum – þú hefur aðgang að umfangsmiklu gagnasafni um störf og námskeið vítt og breitt um Evrópu.

Jafnvel þótt þú sért ekki skráð(ur) geturðu notað sum verkfæranna, s.s. netritilinn og leitartólið til að leita að störfum og námskeiðum.