Oħloq is-CV tal-Europass tiegħek
L-iżviluppatur tas-CV tal-Europass jagħmilhielek faċli biex toħloq is-CV tiegħek online. Tista’ tużah biex tapplika għal opportunità ta’ impjieg, edukazzjoni jew taħriġ kif ukoll biex twettaq xogħol ta’ volontarjat.
Il-format tas-CV l-aktar magħruf fl-Ewropa
Is-CV tal-Europass hija waħda mill-formats tas-CV l-aktar magħrufa fl-Ewropa. Hi faċli biex tintuża u hi familjari mal-impjegaturi u l-istituzzjonijiet tal-edukazzjoni.
L-ewwel ikollok toħloq l-profil tiegħek tal-Europass b’informazzjoni dwar l-edukazzjoni, it-taħriġ, l-esperjenza tax-xogħol u l-ħiliet tiegħek. Wara li tlesti l-profil tal-Europass tiegħek, tista’ toħloq kemm CVs trid sempliċiment bi ftit klikkijiet. Kemm tagħżel liema informazzjoni trid tinkludi, tagħżel id-disinn favorit tiegħek u l-Europass jagħmel il-bqija.
Tista’ toħloq, taħżen u taqsam is-CVs f’31 lingwa. Tista’ tiddawnlowdja is-CV tal-Europass tiegħek, taħżinha fil-Librerija tal-Europass tiegħek taqsamha mal-impjegaturi, mal-EURES jew ma’ aġenziji oħra tal-impjiegi.
Kif toħloq CV tajba
Ftakar li s-CV tiegħek hija l-ewwel opportunità biex tikkomunika l-ħiliet u l-esperjenzi tiegħek lil impjegatur tal-futur. Hi tagħti ħjiel ta’ min int, il-ħiliet, l-isfond edukattiv, l-esperjenzi tax-xogħol u kisbiet oħra tiegħek.
Ġib fid-dieher eżempji tal-ħiliet u l-esperjenzi tiegħek li jaqblu mal-impjieg li qed tapplika għalih. Agħti ħafna attenzjoni lid-dettalji ppubblikati fl-avviż tal-post vakanti.
Kun żgur li taġġorna t-taqsima “Dwari” biex tenfasizza għala int l-aħjar persuna għal dan l-impjieg. Tinkludix storja sħiħa dettaljata. Iffoka fuq il-fatti u l-punti prinċipali li jaqblu mal-impjieg li għandek f’moħħok.
Kun żgur li s-CV hi faċli biex tinqara. Uża lingwa ċara u semplċi. Uża verbi qawwija (eż. “Immaniġġjajt”, “żviluppajt”, “żidt”).
Dejjem elenka l-esperjenza l-aktar reċenti segwita b’dawk preċedenti. F’każ ta’ qabżiet kbar fix-xogħol jew fit-tagħlim tiegħek, agħti spjegazzjoni.
Iċċekkja li ma jkunx hemm żbalji ortografiċi u grammatiċi, ipprovdi indirizz tal-email professjonali u żid ritratti professjonali tiegħek stess.
Il-profil tal-Europass tiegħek
Il-profil tal-Europass tiegħek hu l-post fejn iżżomm rekord tal-ħiliet, il-kwalifiki u l-esperjenzi kollha tiegħek. Jekk iżżomm l-profil tal-Europass tiegħek aġġornat se jkollok dejjem l-informazzjoni kollha li għandek bżonn biex toħloq malajr CVs u applikazzjonijiet imfassla apposta għall-impjiegi.
Nixtiequlek suċċess bl-applikazzjnijiet tiegħek!
Facebook
Twitter
Linkedin
Email