Il-paġna “Jien” hi wirja interattiva tal-informazzjoni kollha tiegħek fil-Europass. Mill-paġna “Jien”, tista’ taċċessa l-verżjoni l-aktar reċenti tal-profil tiegħek. Tista’ tara s-suġġerimenti ta’ impjiegi u korsijiet li tirrifjuta jew tissejvja bħala favoriti. Tista’ wkoll taċċessa l-edituri tas-CV u tal-ittra ta’ akkumpanjament jew iżżid informazzjoni ġdida ma’ “Il-Ħiliet Tiegħi” u “L-Interessi Tiegħi”. Tista’ wkoll tara ir-“Rekord tal-Attivitajiet” tiegħek li jagħtik ħarsa ġenerali lejn l-attività reċenti tiegħek fil-Europass u l-Konfigurazzjonijiet Tiegħi fejn tista’ tamministra l-konfigurazzjonijiet tal-privatezza tiegħek.

Iva, tista’ tapplowdja immaġnijiet, fajls jew iżżid links għall-videos fit-taqsimiet rilevanti tal-profil tal-Europass tiegħek. Dawn se jinħażnu awtomatikament fil-librerija tal-Europass tiegħek jekk int utent reġistrat.

Il-Europass hu l-profil tiegħek u ħadd aktar ma jista’ jkollu aċċess għall-profil tiegħek jew għall-informazzjoni tiegħek. Tista’ tagħżel li tixxerja l-profil tiegħek (jew partijiet mill-profil tiegħek) ma’ kull min tixtieq. Pereżempju, tista’ tixxerja l-profil tiegħek ma’ impjegatur bħala parti minn applikazzjoni għal impjieg. L-utenti reġistrati jistgħu wkoll jixxerjaw il-link tal-profil tagħhom għal perjodu stabbilit ta’ żmien.

Il-profil tal-Europass tiegħek hu l-ispazju online tiegħek biex tirrekordja l-ħiliet, il-kwalifiki u l-esperjenzi tiegħek. Tista’ tinkludi informazzjoni dwar il-ħiliet, il-kisbiet u l-proġetti kollha tiegħek mill-aspetti kollha tal-ħajja tiegħek – ix-xogħol, id-dar, l-istudju, il-volontarjat, u l-passatempi. Qatt tinkludi informazzjoni personali sensittiva fil-profil tiegħek, pereżempju dwar saħħtek, il-kundanni jew informazzjoni tiegħek li mhix rilevanti għall-karriera u l-istudji tiegħek.

Il-profil tal-Europass tiegħek hu l-ispazju online tiegħek biex tirrekordja l-ħiliet, il-kwalifiki u l-esperjenzi tiegħek. Inti meħtieġ timla biss oqsma mandatorji (isem u kunjom). Tista’ tagħżel liema taqsimiet trid tikkompleta u tista’ żżid taqsimiet ġodda b’titlu li tagħżel biex tiddeskrivi l-ħiliet, il-kisbiet u l-proġetti tiegħek. Madankollu, hu importanti li l-profil tal-Europass jiġi aġġornat bil-ħiliet, il-kwalifiki u l-esperjenzi ġodda tiegħek sabiex dejjem ikollok profil aġġornat.

Tista’ toħloq il-profil tal-Europass tiegħek f’30 lingwa differenti. Meta toħloq il-profil tiegħek tista’ tagħżel il-lingwa rilevanti biex toħloq il-profil tiegħek.

Le, m’hemmx għalfejn timla l-profil kollu tal-Europass fi żjara waħda. Fil-fatt, rari ħafna tuża l-elementi kollha jew timla t-taqsimiet kollha f’daqqa. Il-bini ta’ profil hu proċess kontinwu u għandek taġġornah kull darba li tlesti l-istudji, tlesti esperjenza ta’ xogħol ġdida, jew tixtieq tirrekordja ħiliet ġodda li tkun żviluppajt.

Il-profil tal-Europass tiegħek hu privat iżda tista’ tixxerja link għall-profil tiegħek mal-impjegaturi, mal-istituzzjonijiet edukattivi jew mal-konsulenti biex tingħata l-għajnuna jew bħala parti mill-applikazzjoni tiegħek. Tista’ tixxerja l-profil sħiħ tiegħek jew tagħżel li tixxerja taqsimiet speċifiċi tal-profil tiegħek. Tista’ tixxerja l-profil għal perjodu ta’ żmien stabbilit u tista’ “tħassar” il-link fi kwalunkwe ħin sabiex ma tibqax viżibbli għall-partijiet esterni. Dejjem għandek tiżgura li tkun taf l-identità ta’ dawk li tixxerja l-profil tiegħek magħhom u qatt ma għandek tixxerja informazzjoni personali u sensittiva.

Permezz ta’ “L-Interessi tiegħi” utenti reġistrati jistgħu jiddeskrivu l-interessi u l-għanijiet tagħhom fil-Europass. Tista’ tagħżel lista ta’ għanijiet ewlenin marbutin mal-karriera u l-istudji tiegħek jew opportunitajiet oħrajn bħall-volontarjat jew l-ivvjaġġar. Tista’ tindika wkoll il-lokalità(jiet) preferut(i) tiegħek billi tagħżel l-ibliet u l-pajjiżi rilevanti. Finalment, tista’ telenka s-suġġetti u l-ħiliet li tixtieq titgħallem aktar dwarhom. L-informazzjoni f’L-Interessi Tiegħi se tintuża biex tissuġġerixxi impjiegi personalizzati u suġġerimenti ta’ korsijiet għalik.

“Il-Librerija Tiegħi” tal-Europass hi l-ispazju online bla ħlas tiegħek, illinkjata mal-profil tal-Europass tiegħek, fejn tista’ taħżen il-fajls relatati mal-karriera u l-istudji tiegħek. Tista’ tapplowdja u tixxerja s-CVs tal-Europass, l-Ittri ta’ Akkumpanjament, il-Kredenzjali diġitali, il-premjijiet, iċ-ċertifikati, id-diplomi u kwalunkwe dokument rilevanti ieħor. Qatt ma għandek taħżen kwalunkwe dokument li jkun fih informazzjoni personali sensittiva (pereżempju: passwords jew dettalji tal-kont bankarju) fil-librerija tiegħek tal-Europass.